Բաց նամակ

Հայաստանի ռադիոլոգների կոնսոլիդացնող համաժողովի անդամներս` ի գիտություն ընդունելով 18.12.2015թ.  էլեկտրոնային մամուլում հրապարակված տեղեկատվությունը, ըստ որի «Գյումրի» բժշկական կենտրոնի բժիշկ-ռադիոլոգ Նազենի Մալխասյանին  ՀՀ ՔՕ № 130 հոդվածի 2-րդ մասով մեղադրանք է առաջադրվել, համատեղ ուժերով վեր ենք լուծել դեպքին վերաբերող ՀՇ-պատկերները:

Խորին ցավակցություն հայտնելով հանգուցյալի հարազատներին և մերձավորներին, ցանկանում ենք հայտնել այն տեսակետը, ըստ որի ՀՇ-պատկերներում արտացոլված իրավիճակը պատկանում է ըստ Հիվանդությունների Միջազգային -10 դասակարգման

•     սրտի վնասվածք, սրտապարկի արյունազեղում(S 26.0),
•     կողերի բազմաթիվ կոտրվածքներ(S 22.4),
•     կրծքավանդակի օրգանների վնասվածքներ (T 06.5),
•     արյունատար անոթների վնասվածքներ (T 06.3):

Ուստի ստիպված ենք եզրահանգել, որ գործ ունենք կյանքի հետ անհամատեղելի պոլիտրավմայի հետ և` չփորձելով որևէ  կերպ արդարացնել ռադիոլոգի բաց թողումը, պետք է ցավով հուշենք, որ նրա եզրակացությունը չէր կարող փոխել  «Prognosis pessima»    իրավիճակը:

Հաշվի առնելով վերոնշվածը`

1. Խնդրում ենք պատկան մարմիններին վերավորակավորել ներկայացված մեղադրանքը:
2. Կոչ ենք անում դեպքի հետ առնչվող այլ մասնագիտության տեր մեր  բժիշկ գործընկերներին անկեղծ գնահատել սեփական փորձը, հմտությունները, գիտելիքները և հիվանդանոցի հագեցվածությունը նմանատիպ դեպքերի մենեջմենթի առումով ու ստանձնել մեղքի սեփական հատվածը` չբարդելով մեկի վրա ամբողջ պատասխանատվությունը:
3. Մենք մեր կողմից պարտավորվում ենք  «Գյումրի» ԲԿ տնօրինության հարցում-խնդրանքի առկայության դեպքում կազմակերպել Նազենի Մալխասյանի ռադիոլոգիայի բնագավառում վերապատրաստման և գիտելիքների թարմացման միջոցառումները:

Հարցեր, պատասխաններ, մեկնաբանություններ